‘‘Abana b’Imana badatahuye agaciro k’ishengero vyogorana ko turibamwo, ko turikorera canke ngo turyitangire mu gukora uruhara dusabwa n’umwami waryo. Uno musi birashika ishengero rigahabwa agaciro gato, rikirengagizwa hakaba n’abadashaka kuryitirirwa kuko ribatera isoni ubiravye neza usanga kenshi ari kudatahura agaciro karyo canke gucibwa intege n’amakosa akorwa na bamwe bamwe bari muri ryo.’’ Ivyo bishikirizwa na Pasteur Onesphore Manirakiza akaba yabishikirije mu nsiguro y’ijambo ry’Imana yatanzwe mw’ishengero Shammah Temple-Paroisse Mukaza kw’igenekerezo rya 27/7/2025.
Pasteur Onesphore, yisunze amajambo y’Imana ari mu cete Paul yandikiye Abanyefeso 2:11-22; 3:1-11 yarahishuye ibintu 3 biranga ishengero turirabiye mu mugambi w’Imana.
Ibintu bitatu biranga ishengero :
-
Ishengero ni umuryango w’Imana (Abanyefeso 3:6,18): Umuryango w’Imana ni ukuvuga urugo rw’Imana, ahari abitirirwa Imana.
….yukw’abanyamahanga basangiye natwe ibiragwa, basangiye natwe umubiri umwe, basangiye natwe ivyasezeranywe muri Kristo Yesu kubg’ ubutumwa bgiza. Abanyefeso 3:6
Uwo mukozi w’Imana avuga ati: ‘’ turi muri uwo muryango w’Imana, dukwiye kwiyumvira ingaruka zokuba muri uwo muryango w’Imana:
-kugamburukira serugo tugakora ivyo atubwiye ;
– kubana mu bumwe no mu rukundo tukagaragaza vy’ukuri kwari umuryango ;
– Imana yiyemeje kutwitwararika muri vyose nk’uko serugo mwiza yitwararika abagize umuryango wiwe .
Uwo mwungere arongera akavuga ati : ‘’ Ishengero niwo muryango urimwo ikivange c’abantu batandukanye, abize n’abatize, abahambaye n’aboroshe, abatunzi n’abakene, abantu bo mu moko yose….’’
-
Ishengero ni integuro ndende y’ Imana ( Abanyefeso 3:9-10): Ishengero ryamye mu vyiyumviro vy’Imana.
……no guserurira bose ububgiriza bg’ibanga ubg’ ari bgo, ryari rihishijwe, uhereye kera hose, mu Mana Umuremyi wa vyose. Abanyefeso 3:9
David J.Hesselgrave (1924-2018), yabaye umujanabutumwa imyaka 12 muri Japon, afatwa nk’umwe mu bajanabutumwa bakomeye mu kinjana ca 20. Niwe yavuze ati:
“Namba abakristo bakwiye gukunda ivyo Umwami wabo akunda, bakwiye gukunda ishengero n’amashengero.”
-
Ishengero ni ubuhinga bw’Imana ( Abanyefeso 3:10)
…….kugira ngo noneh’ abakuru n’abafise ububasha b’ahantu ho mw ijuru bamenyere kw’ishengero ubgenge bg’Imana bg’uburyo bginshi,…. Abanyefeso 3:10
Ishengero ni uburyo Imana ikoresha mu kwagura ubwami bwayo mw’isi. Pasteur Onesphore mu nsiguro yatanze arerekana ko ishengero ari kibanza abera bakomerezwamwo,bahabwa ingaburo bivanye n’imyaka n’umurwi wose muri ryo. Arongera akavuga ati : ‘’Ishengero niryo rizigama ikibitsanyo c’ukwizera. Ico kibitsanyo ishengero riragihanahana urunganwe ku rundi aho umuvyeyi yigisha uruvyaro rwiwe (2 Tim 1: 5). Abari muriryo barigishanya : Abatama n’abatamakazi bakigisha abagabo n’abakenyezi, abo n’abo bakuze bakigisha abakiri bato, uko bagenda bararutana hakaba guhanahana ubuzima kuko tubigenderamwo turi kumwe.
Pasteur Onesphore Manirakiza afise amabanga menshi arongoye
Pasteur Onesphore Manirakiza, asanzwe aserukira imbere y’amategeko Ishengero Shammah Temple Fellowship, akaba kandi arongoye inama y’abazezwashengero muri Paroisse Muha muri iryo shengero. Asanzwe arongoye kandi Antioch Foundation, isanzwe iriko irafasha abarongozi b’amashengero mu nyigisho ndoramana no kubaha ibikoresha bifasha mu gukomeza abizera mw’ishengero.
Ishengero ni igikoresho Imana ikoresha mu gutegura abantu bayo
David J.Hesselgrave niwe yongera kuvaga ati: ishengero ni bwo buhinga buhambaye Imana ikoresha mu gutegura abakristo, guhanahana ukwizera urunganwe ku rundi, kurungika abajabutumwa mu mahanga, gufasha ikibano ririmwo no kuzigama ukwizera kuzima.
Kuva ku kuremwa kw’isi, Imana yashatse gushiraho ihanga ,umuryango washizwe ku ruhande, ngo ugaragaze ubwiza bw’Imana,batangaze agakiza kandi bagaragaze ubwami bw’Imana mw’isi yononywe n’icaha.
Musomyi, ishengero rifise ikibanza ikihe mu buzima bwawe? Ni gute ubona wogira uruhara mw’ishengero uhereye uno musi?
