Ibihugu vya Leta iharanira intwaro rusangi ya Congo hamwe n’igihugu ca Mozambique, biriko bica mubihe bitoroshe vy’ihamwa ry’abakirisu.
Umwihwezo w’ikigo Middle East Media Institute (MEMRI) “Observation du Moyen Orient”, kivuga ko umuryango w’abo mw’idini rya Isalamu bashobora kuba biyumviriye kugira ibitero mu turere turimwo abakirisu mu gihugu ca Congo.
Nkuko tubibwirwa n’ikinyamakuru Infos Chretienne, uyo muryango w’abo mw’idini rya Islamu, uremeza ivyo bikorwa, inyuma yuko igenekerezo rya 12 Munyonyo 2025, bemereye ko bishe abakirisu 12 mu karere ka Mayba. Ivyo bikaba vyabaye inyuma yuko abasirikare b’idini rya Islamu baheruka kwica abantu batandatu, bakongera bagaturira inzu zirenga 20 mu karere ka Mazenze. Ivyo bikaba biri mu mwihwezo w’ikigo MEMRI.
Amabi nkayo ntariko aba muri RD Congo gusa
Nk’uko ihamwa ku bakirisu ririko riraba mu gihugu ca RD Congo, abakirisu nabo bo muri Mozambique bariko barakorwako n’iryo hamwa.
Ibiharuro vyemezwa n’ikinyamakuru Infos Chrétienne, ni uko abakirisu 4 bishwe, harimwo 2 bishwe baciwe imitwe. Ayo mabi akaba yabereye mu ntara ya Cabo Delgado, ivyanatumye benshi bata izabo barahunga.
Musenyeri Alberto Vera wo muri Paruwasi ya Nacala, mu cegeranyo yahaye ikigo “Imfashanyo kw’ishengero mu Gahinda” (Aide à l’Église en Détresse), avuga ko uburere bwinshi bwo mu gisagara ca Nampula bwaratewe kuva kw’igenekerezo rya 10 Munyonyo 2025, mbere banahitamwo guhunga.
Uyo musenyeri agira ati : ” Haraheze indwi turi mu mubabaro n’agahinda. Imiryango myishi yahisemwo guhungira mu burere harimwo umutekano. Ibihumbi vy’imiryango bari mu marira, biyumvira uburyo bari guhunga igihugu. Ibintu bikomeza kuba bibi cane, aho amazu ashishikara guturirwa, ndeste n’abantu bakicwa.”
Abantu barenga 120 000 baramaze guhunga mu kiringo c’indwi imwe gusa.
Nk’uko tubisanga mu cegeranyo co ku wa 18 Munyonyo 2025 c’umuryango w’ibihugu vy’unze ubumwe (rapport des Nations Unies.), bavuga ko abantu bashika 128 000 bo mu ntara ya Nampula baramaze guhunga mu kiringo c’indwi imwe gusa.
Ariko, hambavu y’ivyo biharuro, biguma vyiyongera, abaserukira amashengero atandukanye muri ico gihugu, barabandanya baharanira amahoro, hamwe no gushigikra abakozweko n’izo ntambara.
Will Hart, Umuyobozi mukuru w’ishiramwe rukristo kw’Isi “ Iris Global,” avuga ko n’ubwo hari ihamwa rikomeye ku bakrisu, igikorwa cabo co kuvuga ubutumwa no gushigikira abari mu ngorane kirabandanya.
” Tubandanya dutanga Ijambo n’Ukuri arivyo Christo, no kwerekana ico bisigura guharira abatugiriye nabi. (…) Ivyo tubikora twishimikije Ijambo ry’Imana. Tubandanya dushiraho amashengero kugira dufashe intama zakomeretse, abakene, abarwaye, hamwe n’abakeneye ubufahsa.”
Nayo kubwa Musenyeri Alberto Vera ahamagarira Leta ya Mozambique gushiraho uburyo bari bukingire abanyagihugu bayo, aho agira ati : ” Dutakambiye Imana kudufasha ikaduha amahoro. Dusaba kandi Leta ya Mozambique gushiraho uburyo bwo gukingira abanyagihugu bayo, bidaciye gusa mu nzego zo kwivuna abasi, ariko kandi biciye mu biganiro, ndeste no muburyo mpuzamakungu.”
Mwomenya ko izo ntambara z’ihamwa ry’abakristo muri ivyo bihugu zatanguye mu mwaka wa 2017 mu ntara ya Cabo Delgado. Inyuma y’imyaka 8 zintanguye, abantu beshi baramaze kwitaba Imana, abarenga umuliyoni nabo barahunga. Uguhamwa kw’ishengero rya Kristo, si ivyubu gusa vyatanguye kera, aho tunabibona mu gitabo c’Ivyakozwe n’Intumwa Igice ca 8: 1-3, aho ishengero ry’i Yerusalemu ryahamwa.
