Bamwe mu bari mu muryango uhurikiyemwo amashengero ya Pentecôte mu Burundi CEPBU (Communauté des Églises Pentecôtes au Burundi) basaba Igihugu c’Ububirigi ngo ntigihirahire ngo gihe ubuhungiro Pasteur Nicolas HAKIZIMANA.
Ivyo biri mw’ikete ririko rirazunguruka, rivuga ko, ari irya bamwe mu bahurikiye mu runani rw’amashengero ya Pentecôte mu Burundi CEPBU bavuga ko, bakozweko n’ibikorwa vya Pasteur HAKIZIMANA, uwahoze ari umunyamabanga w’umuryango wa CEPBU. Iryo kete bakaba baryandikiye ibiro bishinzwe abanyamahanga mu Bubirigi kuwa 18/11/2025 basaba ivyo biro kwima ubuhungiro Pasteur HAKIZIMANA Nicolas, muri kino gihe yagirizwa ivyaha biri mu butungane mu Burundi.
None Pasteur HAKIZIMANA Nicolas yagirizwa iki?
Nk’uko biri muri iryo kete, uwoyahoze ari umunyamabanga wa CEPBU, yavuye mu Burundi kuwa 11/11/2025. Gushika kino gihe bamwe mu bahurikiye mu runani rw’amashengero ya Pentecôte mu Burundi CEPBU, bavuga ko bakozweko n’ibikorwa vya Pasteur HAKIZIMANA, bamwagiriza ubusuma n’ubunyonyezi bw’ubutunzi rusangi n’ubwo urushengero, ugutunga amafaranga menshi bidasiguritse neza iyo ava, ibikorwa vy’iterabwoba no kubangamira umutekano w’igihugu, n’ibindi vyaha bikomeye.
Ayo mashengero asaba Ububirigi kwisunga itegeko ry’abwo rigenga ivyo gutanga ubuhungiro, amasezerano y’i Genève yo mu mwaka wa 1951 n’amasezerano ya ONU, ayo yose akaba atemerera igihugu cayateyeko umukono guha ubuhungiro uwagirizwa ivyaha nk’ivyo Pasteur Nicolas HAKIZIMANA yagirizwa, canke umuntu wese afise ivyo yagirizwa n’ubutungane.
Muri urwo rwandiko, ayo mashengero avuga ko yakozweko n’ibikorwa vya Pasteur HAKIZIMANA, arangiza asaba ubutegetsi bw’igihugu c’Uburigi gukorana n’Uburundi kugira Pasteur Nicolas HAKIZIMANA yitabe ubutungane hama yisigure kuvyo yagirizwa. Iryo kete rikaba ryateweko umukono na Gabriel BIJIYOBIJA aserukira uruhande gwa CEPBU rugizwe n’amashengero avuga ko yaguye mu mporero z’amatati ahitiye muri ugwo runani (les églises victimes).
Ivyo biri ukwo mu gihe mu muryango w’ishengero rya Pentecôte mu Burundi hamaze igihe hari indyane ahanini zifatiye Ku burongozi bw’awo.
