Ku muhingamo wo kuri uyu w’Imana igenekerezo rya 23 Munyonyo, chorale Revelation Sound ikorera mw’ishengero Méthodiste Libre paroisse Kamenge aho benshi bita kwa Ananiya ishigikiwe n’uburongozi bw’iyo paroisse, yaratunganije igiteramo kidasanzwe co guhimbaza Imana citiriwe “Ineza concert” cabereye mu kibanza c’ishengero c’iyo paroisse nyene.
Igiteramo “ineza concert”, cari citabiriwe n’abatari bake baje bava mu mihingo itandukanye aho amashimwe n’akanyamuneza arivyo vyabaranga. Ijambo nshimikiro ry’ico giteramo turisanga muri Tito 3:3-5.
Rév. Pasteur Ngenduku Vital, umwungere mukuru w’ishengero Méthodiste Libre Paroisse Kamenge ari nawe yagabuye ijambo ry’Imana muri ico giteramo, aratubwira impamvu bahisemwo kwita ico giteramo “Ineza concert”, yagize ati:
“kubera ko abantu benshi bakiri mu nzira y’icaha bari kure y’ineza y’Imana, twavuze tuti, reka dutunganye kino gikowa twerekane y’uko Imana igiraneza ishobora gukura abantu kure mu vyaha ikabazana mu muco wayo ikabereka ubugingo nyakuri ubwo aribwo, ikabazana mu gakiza biciye mu kwakira Yesu Kristo nk’Umwami n’umukiza mu buzima bwabo. Intumbero yacu dufise n’iyo kuvuga ubutumwa bwiza, kugira ngo benshi baze kuri Kristo hama ineza y’Imana irwire mu buzima bwa benshi.”
Dieudonné Niyonzima arongoye chorale Revelation Sound, yavuze ko akanyamuneza ari kenshi cane kuri iyo chorale no kw’ishengero muri rusangi, kubera ko bashikije intumbero ya Kristo mu kuja kuvuga ubutumwa bwiza mu kibano no mu mabarabara aho abashika kuri mirongo itandatu (60) bashoboye kwakira Yesu Kristo nk’umwami n’umukiza mu buzima bwabo. Yabandanije avuga ko, Igiteramo Ineza concert, gitunganijwe kugira ngo bigine iyo ntsinzi idasanzwe y’abo bakiriye agakiza kubw’ubuntu n’ineza Y’Imana igirira abantu bayo.
Intumbero ya Chorale Revelation Sound, si ukuririmba canke kuguma mu rushengero gusa ariko harimwo no gusohoka impome zine zigize urusengero, bakaja kwamamaza ubutumwa bwiza kuri bose, kubera ko ineza y’Imana iri ku bantu bose. Kubw’ivyo ico gikorwa c’ivugabutumwa kizobandanya gitunganywa uko umwaka utashe nk’uko umukuru w’urwaruka muri iyo paroisse Fabrice Niyobuhugiro abivuga.
Hamwe n’ivyo, imbere y’uko ico giteramo kiba, ku musi wa gatandatu igenekerezo rya 22 Munyonyo 2025, abagize iyo chorale bazindukiye mu gikorwa kidasanzwe c’ivugabatumwa mu mihana no mu mabarabara.
Umwe mu banyeshengero bari bitabiriye ico giteramo, yarashimishijwe cane n’ukuntu ico giteramo cari gitunganijwe, yagize ati:
“Imana yabanye natwe, naryohewe cane biciye mw’ijambo ry’Imana hamwe n’indirimbo, numvise ndemye nongera ngira ukwizera ko Ineza n’ubuntu vy’Imana biri kuri buri muntu wese, kuba naje muri iki giteramo nungutse vyinshi cane”.
Mwomenya ko, ico giteramo caranzwe n’ibihe vyiza bidasanzwe vyo guhimbaza no gutazira Imana, kandi ko cari catewe iteka n’abakozi b’Imana batandukanye hamwe n’ayandi ma chorales yo mu mashengero ya Méthodiste Libre yaje ava muyandi ma paroisses nka Mutanga Nord,Gikungu na Ngagara.
