Mu gihe uno musi, kw’isi yose, amashengero rukristo yijukiye gukoresha imbuga hwaniro nk’igikoresho njanabutumwa, Reta y’Ubushinwa (Chine) yo suko ibibona. Ivyo tubisanga mu ngingo nshasha iyo Reta yashize ahabona kw’igenekerezo rya 15 Nyakanga 2025, zigiye kugenga ikoreshwa ry’izo mbuga.
Izo ngingo zose hamwe zikaba ari 18. Inkurikizi k’uwuzozirengako, yaba umupasitori canke uwurongoye abandi, nuko azoca akugwa mu bikorwa ajejwe, imbuga ziwe zose zugagwe, ndetse ahanwe hisunzwe amategeko.
Zimwe mu ngingo zikuru zikuru ziri mu rwandiko rwashizwe hanze n’ubushikiranganji bwa Reta bujejwe ivy’Iyobokamana (Administration nationale des affaires religieuses) ziboneka ko zikomeye gusumba izindi, ni ingingo ya 5 hamwe n’ingingo ya 10.
Ingingo ya gatanu (5) ikaba ivuga ko “Abapasitori n’abarongozi b’ amashengero ntibemerewe kwigisha canke kuvuga ubutumwa bwiza ku mbuga hwaniro z’ishengero canke imbuga zabo bwite, kiretse babicishije ku mbuga nka : Site web, application, forums, plateformes zegukira iryo shengero, naho nyene zemewe n’igihugu ubwa mbere ariko kandi zifise uruhusha rugenga ibikogwa vy’itangazamakuru rukristo kurubuga ngurukanabumenyi (Licence de services d’information religieuse sur Internet.)”
Ingingo ya 10 nayo ikavuga ko Amashengero atemerewe kwigisha canke gutunganya inyigisho ndora Mana ku bana canke imiyabaga, zobatwara ku kwizera biciye ku mbuga hwaniro.
Kubari basanzwe bafise imbuga zitujuje ibisabwa n’amategeko, bakaba bahamagarigwa kuvyuzuza canke kwugara burundu izo mbuga bahorana.
Ikindi n’uko ata muntu ku giti ciwe yemerewe gukoresha urubuga rwa Facebook, WhatsApp, Wechat, canke kwerekana amasanamu ikibiriraho (live streaming) atanga inyigisho canke avuga ibijanye n’ijambo ry’Imana.
Mu nyandiko z’ikinyamakuru Bitter winter gisanzwe gikurikiranira hagufi ibijanye n’uburenganzira bw’umwenegihugu, co kigira giti :
“Si irya mbere Ubushinwa bufashe ingingo mwene izo, zijanye n’ubuzima ndora Mana bw’abakristo. Izo ngingo zikaba zije ziremereye gusumba izahahora, kuko zije kwaka uburenganzira bwo gukoresha imbuga hwaniro mu mwidegemvyo ku bakristo.”
Mwomenya ko gushika ubu Ubushinwa buri mu kibanza kigira 15 mu bihugu 50 bigoye kuba Umukristo kw’isi, nk’uko bitangazwa na World Watch List 2025 y’imiryango yuguruye (Portes Ouvertes).
Soma n’ibi:
ETS-Kamenge: Abanyeshule 19 nibo bemeye kwakira Yesu nk’Umwami n’Umukiza mu bugingo bwabo
