Abakristo bo mw’ishengero rya pentekote barahagaritswe umutima n’uko bishoboka ko mu misi iri imbere iryo shengero rishobora kwicamwo ibice, aho mbere bafise ubwoba ko mu gikorane c’ivugabutumwa categuwe n’ishengero Pentecôte ry’I Kiremba, kizoba kuva kuri uyu wa 12 gushika kuri uyu wa 15 Nyakanga 2025 hashobora kwaduka imishwano.
Mu rwandiko rwo kuri uyu wa 4 Nyakabiga 2025, aba Pasitori 11 b’amashengero ya Pentecote muri Misiyoni zitandukanye, bahurikiye muri CEPBU (Communauté des Eglises de Pentecôte du Burundi) bandikiye umushikiranganji w’intwaro yo hagati mu gihugu, basaba ko ishengero rya Pentecôte ry’i Kiremba ritokwatira Eliachim Nirikana, umwungere wa kabiri w’iryo shengero ngo arirongore, inyuma yuko Pasitori Elie Ndikunkiko, yitavye Imana ku wa 7 Rusama 2024.
Abo bungere b’amashengero ya Pentecôte atandukanye bagira bati :
“Abapasitori bakuru bose bo muri CEPEBU bategerezwa kugishwa inama mu nteguro yo gutora umwungere w’ishengero, nk’indorerezi kandi ko ukwatirwa kwiwe gutegerezwa kwemezwa n’ishirahamwe ry’amashengero ya Pentecôte mu Burundi, CEPBU”.
Bashikiriza ko ishengero rya Pentecôte ry’i Kiremba rigomba gushiraho umwungere waryo mu gikorane c’ivugabutumwa, kizoba kuva kuri uyu wa 12 gushika kuri uyu wa 15 Nyakanga 2025 bidakurikije amategeko kuko ngo ntabwo bose babihurizako.
Ukwo kutumvikana guhagaze ku burongozi, hari uruhande rwipfuza ko ishengero Pentecôte ryotwarwa n’umuntu umwe, ishirahamwe CEPBU rihurikiyemwo amashengero ya Pentecôte mu Burundi rikaba ishengero. Ni mu gihe ku rundi ruhande, hari ababona ko uburere bwose bita Misiyoni bukwiye kwigenga, bukitunganiriza ivyabwo atawe barinze kubaza.
Read also :
Ishengero ni ishirahamwe ritandukanye n’ayandi mashirahamwe yose
Ayo matati si ay’ubu aramaze igihe
Mu mwaka uheze wa 2024 , harabayeho ugucanamwo, aho ishengero rya Pentecôte i Kiremba muri komine Bururi intara nshasha ya Burunga ryahavuye ribona ko rikwiye kwigenga ariko ubushikiranganji bw’intwaro yo hagati mu gihugu buraryankira, rica ryitura umukuru w’igihugu. Mu mpera z ‘uwo mwaka nyene, niho havugwa ibijanye n’uko uwuzoba arongoye Pentecôte mu Burundi azokwitwa “Super Archevêque”, biciye mu nama yari yahuje bamwe mu bagize CEPBU. Muri iryo koraniro, hari hatowe Esron Nizigama, Pasitori wa mbere wa Kayogoro, ngo abe “Super Archevêque”.
None ubwo ntihazohava haba imishwano muri ico gikorane?
Mu kiganiro, Parfait Mboninyibuka arongoye intara ya Burunga yahaye Ikinyamakuru Yaga Burundi bamubaza ko hadashobora kuba ugushamirana hagati yabo barongozi muri ico gikorane c’ivugabutumwa kizotangura kuri uyu wa 12 gushika ku wa 15 Nyakanga 2025 i Kiremba muri komine Bururi, nk’uko bihora biba kuyandi mashengero yagize Ati : “Inzego zijejwe intwaro n’umutekano zibikurikiranira hagufi. Mu gihe hoboneka ibimenyetso vy’ihungabana ry’umutekano, hoheza hagafatwa ingingo”.
Read also :
None kugeza ubu muri Leta babivugako iki?
Mu rwandiko rw’umuyobozi mwishikira mu biro vy’umukuru w’igihugu rwo ku wa 26 Ntwarante 2025, yerekana ko “ishirahamwe CEPBU ryahawe uburenganzira bwo kwitwa ishengero kandi abagize ishirahamwe batavyumvikanyeko, ari nawo muzi w’izo ndyane zose”, ishengero Pentecôte ry’i Kiremba rica ryemererwa kwigenga biciye mu rwandiko rw’ubushikiranganji bw’intwaro yo hagati mu gihugu, rushira mu ngiro ivyategetswe n’umukuru w’igihugu. Ubu, iryo shengero rifise uwuriserukira imbere y’amategeko.
Nayo, umuyobozi mukuru ajejwe amashirahamwe adaharanira ivyicaro vya poritike, imigambwe n’amadini mu bushikiranganji bw’intwaro yo hagati mu gihugu iterambere rusangi n’umutekano, mukiganiro yagiraniye bagenzi bacu bakorera Ikinyamakuru Yaga Burundi avuga ko iryo kete ryo kuwa 4 abo barongozi bagurungikiye umushikiranganji ritarabashikira : “Iryo kete ntiriranshikira. Ariko ikibazo c’ishengero rya Pentecôte ubu kigeze mu nzego zidukurira. Ibiro vy’umukuru w’igihugu vyabasavye kugira ikoraniro rya bose ariko nta cavuyemwo, bavanye ataco bumvikanye. Nitwaronka iryo kete, tuzoheza tubishure”.
Mwomenya ko ingorane nk’izo mu mashengero yo mu Burundi zamye ziriho , aho mu mwaka wa 2020, mw’Ishengero ry’aba adventistes b’umusi w’indwi naho nyene higeze kuba hari ibibazo vyerekeye k’uburongozi aho vyatorewe umuti mu nama y’umushikirangaji w’intwaro yo gahati mu gihugu iterambere rusangi n’umutekano Gervais Ndirakobuca ari kumwe n’abaserukira iryo shengero muri Afrika.
Read also:
Umwungere News yatanguje inyigisho ku bimenyereza umwuga wo kumenyesha amakuru y’iyobokamana
